SSL грешки: „Not secure“, сертификат за друг домен и „handshake failed“

Мартин Фидановски2 мин. читање

SSL сертификатот го шифрира сообраќајот меѓу посетителот и сајтот и го дава катанецот до адресата. Кај сите наши хостинг пакети сертификатот е вклучен и се издава и обновува автоматски. Кога нешто не е во ред, прелистувачот покажува една од неколку пораки. Еве што значи секоја.

„Not secure“ до адресата, без црвен екран

Страницата се отвора, но без катанец. Две најчести причини:

  • Сајтот се отвора на http://. Пренасочете го сиот сообраќај на https://. Во WordPress, во Settings → General, двете адреси треба да почнуваат со https://. Во cPanel, во Domains, вклучете Force HTTPS Redirect.
  • Мешана содржина (mixed content). Страницата е на https, но некоја слика или скрипта се вчитува преку http. Во прелистувачот притиснете F12 и отворете Console: секој таков ресурс е наведен. Сменете ги линковите на https. Кај WordPress, додаток како Really Simple SSL ги поправа автоматски.

„Your connection is not private“ (NET::ERR_CERT_COMMON_NAME_INVALID)

Сертификатот е за друго име. Најчесто:

  • Доменот уште не покажува кон серверот. Сертификатот се издава дури откако доменот ќе покаже кон хостингот. Проверете ги записите според водичот за поврзување домен со хостинг.
  • Нема запис за www. Ако vashafirma.mk работи, а www.vashafirma.mk не, додадете CNAME запис за www.
  • Нов или штотуку префрлен домен. Почекајте неколку часа, или во cPanel отворете SSL/TLS Status и кликнете Run AutoSSL.

„Your connection is not private“ (NET::ERR_CERT_DATE_INVALID)

  • Датумот на уредот е погрешен. Ако грешката ја гледа само еден компјутер или телефон, проверете го часовникот и датумот на него.
  • Сертификатот е истечен. Автоматското обновување не успеало, речиси секогаш затоа што доменот привремено не покажувал кон серверот. Во cPanel, SSL/TLS Status, кликнете Run AutoSSL. Ако пак не успее, порачката под доменот ја кажува причината.

ERR_SSL_PROTOCOL_ERROR или „SSL handshake failed“

Прелистувачот и серверот не можат да се договорат за шифрирана врска.

  • Cloudflare. Ако доменот е преку Cloudflare, во SSL/TLS поставете го режимот на Full (strict). Режимот Flexible често предизвикува грешки и бескрајни пренасочувања.
  • Многу стар уред или прелистувач. Современите сервери не прифаќаат застарени протоколи. Ажурирајте го прелистувачот.
  • Антивирус или корпоративна мрежа што го проверува сообраќајот. Пробајте од мобилен интернет: ако таму работи, проблемот е во мрежата, не во сајтот.

„Too many redirects“ по вклучување на HTTPS

Две правила се бркаат меѓусебно, на пример пренасочување во .htaccess и уште едно во додаток или во Cloudflare. Оставете само едно пренасочување на https.

Брза проверка

  1. Отворете го сајтот со https:// и без и со www.
  2. Кликнете на катанецот и проверете на кое име е сертификатот и до кога важи.
  3. Ако нешто не се совпаѓа, во cPanel отворете SSL/TLS Status и кликнете Run AutoSSL.

Не сте сигурни што е SSL и зошто е важен? Прочитајте што е SSL сертификат. Ако грешката останува, отворете тикет со адресата и слика од екранот со грешката.

Поврзани статии

Сите статии