Клиентот вели дека не ја добил понудата, а вие сте ја пратиле. Пораката е во неговиот спам. Најчестата причина не е содржината, туку тоа што вашиот домен не докажува дека пораката навистина доаѓа од него. Gmail, Outlook и Yahoo веќе бараат таков доказ, особено од фирмени адреси.
Доказот се три DNS записи: SPF, DKIM и DMARC.
SPF: кој смее да праќа во ваше име
SPF е TXT запис што ги наведува серверите што смеат да праќаат пораки од вашиот домен. Изгледа вака:
v=spf1 +a +mx +ip4:IP-адреса-на-серверот ~all
Ако пораката дојде од сервер што не е на листата, примачот ја смета за сомнителна. Доменот смее да има само еден SPF запис. Ако праќате и преку друга услуга (на пример Mailchimp или Google Workspace), нивниот include: се додава во истиот запис, не во нов.
DKIM: дигитален потпис на секоја порака
DKIM ја потпишува секоја порака со клуч што е само на вашиот сервер, а јавниот дел од клучот е во DNS. Примачот го проверува потписот и знае дека пораката не е сменета на патот и дека навистина е од вашиот домен.
DMARC: што да се прави со лажните пораки
DMARC им кажува на Gmail и Outlook што да направат со порака што тврди дека е од вашиот домен, а не поминува SPF или DKIM: да ја пуштат, да ја стават во спам или да ја одбијат. Тоа ве штити и од измамници што праќаат лажни фактури „од ваше име“. Почнете со запис што само следи:
_dmarc TXT v=DMARC1; p=none; rua=mailto:dmarc@vashafirma.mk
По неколку недели, кога ќе видите дека вашите вистински пораки поминуваат, сменете го p=none во p=quarantine, а подоцна во p=reject.
Како да ги поставите во cPanel за 10 минути
- Во клиентскиот панел отворете го хостинг пакетот и кликнете „Влези во cPanel“.
- Во делот Email отворете Email Deliverability. За секој домен ќе видите дали SPF и DKIM се во ред.
- Ако пишува „Problems Exist“, кликнете Manage. Ако доменот ги користи нашите nameservers, копчето Repair ги поправа записите автоматски.
- Ако DNS-от е кај друг провајдер, cPanel ги покажува точните вредности. Копирајте ги и додадете ги таму како TXT записи.
- DMARC записот го додавате сами: во cPanel тоа е Zone Editor, нов TXT запис со име
_dmarc, а ако DNS-от е на друго место, таму.
Не знаете каде ви е DNS-от? Прочитајте како да го поврзете доменот со хостинг.
Како да проверите дали работи
Пратете порака до своја Gmail адреса, отворете ја, кликнете на трите точки и изберете „Show original“. Треба да пишува SPF: PASS, DKIM: PASS и DMARC: PASS. Ако некое е FAIL, вредноста во DNS не е иста со онаа во cPanel.
Ако записите се во ред, а пораките пак одат во спам
- Масовни пораки. Билтени до стотици адреси не праќајте од обично сандаче. Користете услуга за билтени, со нејзиниот
include:во SPF. - Содржина. Само слика без текст, скратени линкови и прилози како .zip или .exe ја зголемуваат спам оценката.
- Нов домен. На нов домен Gmail му верува помалку во првите недели. Почнете со обична кореспонденција со луѓе што ќе ви одговорат.
- Препратување (forwarders). Пораките што автоматски се препраќаат на Gmail понекогаш го губат SPF-от. Подобро е сандачето да го поврзете директно во апликацијата.
Ако сè е проверено, а проблемот останува, отворете тикет со заглавието („Show original“) од една порака што отишла во спам и ќе провериме и од страната на серверот.







